Sýndu heiminum list þína

Varla er það fréttnæmt á landsvísu að listakonan Sandra María skuli hafa sent inn verk í netsamkeppni Saatchi.

Þeir eru ófáir myndlistarmennirnir sem hafa fengið netpóst frá starfsmönnum netgallerísins til að hvetja þá til þátttöku. Ég hef fengið póstinn í þrígang en hef þó ekki sent neitt inn, ennþá allavega. Veit þó að nokkrir nemendur í Myndlistarskólanum í Reykjavík slógu til. 

Sennilega hefur blaðamaður gleymt sér í einhverri ofurvirðingu fyrir Saatchi galleríinu og áætlað að þetta væri stórmerkilegt að íslendingur væri á þeirra snærum. Gleymt að kanna málið frekar.  En þetta er jú opið hverjum sem er undir slagorðinu "Show your art to the world".

Það er svosem ástæðulaust að gera lítið úr netgalleríinu. Þetta er örugglega ágætis framtak og hefur þessi hjákátlega menningarfrétt sennilega sparað starfsmönnum "Saatchi online" einhverja vinnu. En það væri óskandi að menningarfréttir væru málefnalegri en raun ber vitni og gengu út á eitthvað annað en ímyndaða sigra íslendinga í útlöndum.

Tekur þátt í keppni netgallerís Saatchi

Athugasemdir

[Ragga (IP-tala skráð) 11.2.2008 kl. 20:48]

Ég hallast einmitt að því að blaðamaður viti ekki hvernig síðan virki.

Ég var í MÍR þegar að Brooks Walker mældi með því að við skráðum okkur sem og ég gerði, ég hef hinsvegar aldrei notast við þessa síðu.  

[Ransu, 11.2.2008 kl. 20:56]

Já, Ég fékk einmitt póst fyrir stuttu frá einhverjum starfsmanni Saatchi online sem bað mig um að hvetja nemendur skólans til að skrá sig.  Þeir hafa sennilega skannað kennaraskrána.  Þetta var fyrir utan fyrrgreinda þrjá pósta.

[Ragga (IP-tala skráð) 12.2.2008 kl. 22:35]

Afhverju þessi æsingur í að fólk skrái sig...

[Ásgeir Kristinn Lárusson, 13.2.2008 kl. 07:50]

- Saatchi´s next topartist -

[Hlynur Hallsson, 14.2.2008 kl. 00:44]

Einkennilegt að senda þrjá pósta á fólk. Einmitt búinn að fá þrjá eins frá frú Saatchi og flokka þetta sem spam. Var pínu upp með mér eftir þann fyrsta en samt hæfilega tortrygginn og eftir annan skoðaði ég loksins þetta netgallerí þeirra og komst að því að þarna er aðallega drasl. Getur vel verið að einhverjir ágætir listamenn hafi látið glepjast en aðallega (ca.90%) er þetta bara slappt dót. Og varla fréttnæmt að einhver íslendingur taki þátt. Bestu kveðjur,

[Kristbergur O Pétursson, 15.2.2008 kl. 09:25]

Ég veit ekki í hvaða frétt er verið að vísa til, en það er ekki fréttaefni að taka þátt í Saatchi. Þau hjá Saatchi senda út villandi skilaboð að mínu mati, um að þau hafi fundið og skoðað efni listamanns á netinu og liggur í orðunum að hann hafi verið valinn. Sammála Hlyni um gæðin þarna. Ég skráði mig inn en veit ekki hvaða gagn má hafa af.