Listamaður kynntur: Gunther Fruthrunk

Fyrir aðra kynningu á listamanni ákvað ég að snúa mér að geometríunni og fjalla um listamann sem er mjög virtur í sínu heimalandi og einhverjum nágrannalöndum en nær ekki mikið út fyrir það, nema þá helst meðal innvígðra og einlægra áhugamanna um strangflatarlist.

       

Gunther Fruhtrunk heitir maðurinn og fæddist í Munchen árið 1923. Eftir framhaldsskóla hóf hann nám í arkitektúr. Hann hætti námi eftir 2 ár og klæddist þá snjógalla til að gegna herþjónustu hjá þriðja ríkinu í fjalllendi Finnlands í síðari heimstyrjöldinni. Leitandi að einhverri fegurð innan um óhugnað stríðsins hóf Fruhtrunk að mála landslagsmyndir og var  innblásinn af birtu og skörpum litum svæðisins.  

 Eftir stríð snéri hann sér alfarið að listum. Kynntist konstrúktivisma og Bauhaus stefnunni og heillaðist þá að strangflatarlist og gestalt (skynheildarfræði) kenningum. Árið 1954 fluttist Fruhtrunk til Parísar og starfaði nokkur ár sem aðstoðarmaður Fernands Legers og síðar hjá Jean Arp. 

 Fyrstu geometríur Fruthrunks voru akademískar, en á sjöunda áratugnum snéri hann sér að einfaldari formgerð og einblíndi á hrynjandi lita þar sem rendur brotna kerfisbundið og skapa skynvillur. Hann var því jafnan felldur við op list, þótt hann sé sjaldnast í hópi þeirra sem listasagan hefur sett í forgrunn þeirrar liststefnu, enda snerti listamaðurinn ekki síður mínimalisma sjöunda áratugarins  Þetta eru einstök málverk. Sjónrænt áleitin og áferðin spegilslétt. Nokkuð framsækin fyrir sinn tíma en standast samt tímans tönn og viss undanfari fyrir listamenn á borð við Daniel Buren og Olivier Mosset.  

Fruthrunk tók eigið líf á vinnustofu sinni árið 1982, þá 59 ára gamall.

Athugasemdir

[Ásgeir Kristinn Lárusson, 10.12.2007 kl. 13:19]

Takk fyrir pistilinn - heimurinn er fullur af þekktum og óþekktum listamönnum, lífs og liðnum. Í gær var Frthrunk dauður og gleymdur - í dag vakinn til lífs...

[Ragga (IP-tala skráð) 10.12.2007 kl. 17:35]

Takk fyrir þetta.

[Þorkell Sigurjónsson, 10.12.2007 kl. 21:57]

Frábært að fylgjast með, takk fyrir.

[Hrafnhildur Ýr Vilbertsdóttir, 11.12.2007 kl. 00:38]

Takk fyrir áhugaverðan pistil,ligg sjálf í bókalestri þessa dagana um hina ýmsu listamenn...í stað þess að vera jólast, er einkennilega heilluð af því að lesa um listamenn sem gengu í gegnum mikið sálarstríð og háðu marga erfiða baráttuna, andlega og efnislega, náðu engu að síður að setja sín spor í listasöguna......magnað.