Listamaður kynntur: Louis Soutter

Ein ástæða fyrir því að ég opnaði bloggsíðu var að mig langar til að koma á reglulegri kynningu á myndlistarmönnum og geyma á einhverjum vissum stað á netinu. 

Það var vandalaust fyrir mig að finna listamann til að hefja leikinn. Einn af mínum uppáhalds málurum, Louis Soutter.

           

Louis Adolphe Soutter fæddist árið 1871, sonur apótekara í Morges í Sviss. Hann hneigðist snemma til lista. Hóf nám í arkitektúr og nam síðan fiðluleik í Konservatoríum í Brussel. Hann bjó til skamms tíma í Colorado í Bandaríkjunum þar sem hann var deildarstjóri listasviðs við gagnfræðiskólann (High school) í Colorado spring. Hann giftist Bandarískri konu en naut sín ekki vel í Bandaríkjunum og fluttist aftur til Sviss þar sem hann tók sæti sem fiðluleikari í sinfóníuhljómsveit Lausanne og síðan í sinfóníuhljómsveitinni í Genf.

Soutter átti við geðræn vandamál að stríða og árið 1922 var hann í fyrsta sinn lagður inn á stofnun sökum þessa. Upp frá því fór tónlistaferill hans niður á við og hann hóf að stúdera skúlptúr.  Hann hélt góðu sambandi við frænda sinn og velgjörðarmann, arkitektinn Le Corbusier, sem hvatti hann til listsköpunar og árið 1923 tók Soutter til við að mála og teikna. Árið 1937 gerði hann sín fyrstu fingurmálverk, þ.e. málverk unnin með fingrunum einum, sem hann varð síðar þekktur fyrir og þeirri tækni hélt hann til streitu þar til hann lést á geðveikrahælinu í Ballaigues árið 1942. 

    

Fingurmálverk Soutters eru yfirleitt svörtmáluð á pappír eða hafa allavega svartan sem meginlit. Þau eru hrá og agressíf og vísar viðfangsefnið oftar en ekki til kristinnar trúar. Soutter varð aldrei meginstraumslistamaður. Hann hélt þrjár myndlistarsýningar á meðan hann lifði og höfðu verk hans umtalsverð áhrif á Franska listamanninn Jean Dubuffet og síðar á þýsku listamennina Arnulf Reiner og A.R. Penck sem voru meginstraumslistamenn og tákngervingar hispursleika nýja tjástílsins á níunda áratug síðustu aldar.

Ég sá sýningu á verkum Louis Soutters í Köln árið 1990. Þau voru ótrúleg og náðu svo beint inn á sál mína að ég kom vart upp orði í sólarhring á eftir.

Athugasemdir

[Hrafnhildur Ýr Vilbertsdóttir, 21.11.2007 kl. 17:14]

Takk fyrir góðan pistil, það verður áhugavert að sjá hverja þú kynnir til leiks og reyndar finnst mér þetta mjög góð hugmynd hjá þér að vera með þessar kynningar. Hef aldrei heyrt þennan listamann nefndan fyrr en það er svo sem ekki að marka, maður þekkir ekki nema brot af þeim aragrúa listamann sem eru til og hafa verið til. En myndirnar hans Louis eru áhrifamiklar þó ég sjái þær einungis á tölvuskjá,  og þá get ég rétt ýmindað mér hvernig það er að horfa á þær live.

[Ásgeir Kristinn Lárusson, 21.11.2007 kl. 18:07]

Kærar þakkir fyrir þetta mjög svo þarfa framtak - myndlist þeirra, er átt hafa og eiga við geðræn vandamál, hefur alltaf heillað mig. Oft er sú list göldrum líkust og fölskvalaus...

[Þorkell Sigurjónsson, 23.11.2007 kl. 18:10]

Þetta er sko draumur í dós, að kynna þennan ágæta listamann, sem ég reyndar þekki ekkert til en því áhugverðara að kynnast. Þessar myndir sem þú birtir hér falla mér vel, lifandi og sterkar. Hlakka til að að kynnast næsta listamanni sem þú kynnir. Kveðja.