Gjörningalandslið Íslands

Venjulega þegar fjallað er um myndlistarviðburð í fjölmiðlum þarf blaðamaður á einhvern hátt að gefa lesendum ástæðu fyrir því að viðburðurinn sé á annað borð til umræðu í fjölmiðlinum, og er þá jafnan slegið fram mikilsverðum fyrirsögnum eins og "Landsliðið í gjörningum" sem kynnt var í Morgunblaðinu í dag. 

En auðvitað er þetta ekki landslið sem var til umfjöllunar, heldur félagslið Kling & Bang, sem hampaði  íslandsmeistaratitli í hittifyrra og eftir þessa umferð trónir það í efsta sæti "Landsbankadeildarinnar". Fast á hælum þeirra kemur svo lið Nýlistasafnsins, íslandsmeistarar frá því í fyrra, og í 3-4 sæti eru lið Myndhöggvarafélagsins og i8 sem eru til alls líkleg á árinu.

Ég tók það á mig að vera sjálfskipaður landsliðseinvaldur Gjörningaliðs Íslands. Og eftir stutta íhugun hef ég nú skipað Gjörningalandsliðið þetta árið.

Gjörningalandslið Íslands

Þjálfari: Magnús Pálsson (Magnús var margfaldur íslandsmeistari með gjörningaliði SÚM á áttunda áratug síðustu aldar. Hann lék um skeið með annaradeildarliði í Lundúnum en hefur undanfarin ár þjálfað sigursælt gjörningalið Nýlistasafnsins)

Aðstoðarþjálfari: Hlynur Hallsson (Hlynur er reyndar spilandi þjálfari á vinstri kantinum. Hann lék lengi sem atvinnumaður í Hannover í Þýskalandi en fluttist svo norður til Akureyrar til að sinna uppbyggingarstarfi þar.  Hann fremur sjálfur gjörninga en er ekki síður sigursæll í að skapa vettvang fyrir gjörninga annarra)

*

Mark: Halldór Ásgeirsson (Halldór er litríkur en rólyndis markmaður sem leynir á sér.  Hann lék með liði Nýlistasafnsins á níunda áratugnum en með liði Myndhöggvarafélagsins á þeim tíunda. Undanfarin ár hefur hann spilað með litlu félagsliði í Japan)

Vörn: Rúrí (Rúrí hefur löngum staðið vörn um Íslenska náttúru. Hún leikur með gjörningaliði Myndhöggvarafélagsins og er þeirra traustasti leikmaður)

Vinstri kantur: Sara Björnsdóttir(Sara leikur með Gallerí Ágúst sem í fyrra lék sitt fyrsta tímabil í "Landsbankadeildinni". Sara er þó enginn græningi í greininni. Hún hefur áður leikið með Gallerí Hlemmi, Gallerí Skugga og Kling & Bang).

Hægri kantur: Gjörningaklúbburinn (Þær Eyrún, Jóní og Sigrún eru eiginlega lið í sjálfu sér, en leika þó saman sem einn leikmaður. Þær leika með liði i8)

Miðja: Hannes Lárusson (Hannes er fyrirliði landsliðsins. Framsækinn reynslubolti. Hann er margfaldur meistari með liðum Nýlistasafnsins og Myndhöggvarafélagsins, en hefur nú verið keyptur yfir til liðs Kling & Bang og mun leika með þeim næstu misserin)

Sókn: Ragnar Kjartansson (Ragnar var valinn besti leikmaður "Landsbankadeildarinnar" á síðasta ári og var jafnframt markahæstur leikmanna. Hann vakti strax athygli í undirdeildarleikjum Klink & Bank, lék svo með liði Nýlistasafnsins en var keyptur yfir til i8 í fyrra en situr nú yfir tilboðum frá atvinnuliðum í Þýskalandi, Ítalíu og Bandaríkjunum).

*

Varamaður: Ásmundur Ásmundsson (Ásmundur vakti fyrst athygli með gjörningaliði Nýlistasafnsins en hélt svo til Berlínar til að reyna fyrir sér í atvinnumennsku. Ásmundur snéri heim í fyrra eftir lítilsháttar meiðsl og leikur nú með liði Kling & Bang)

Varamaður:  Egill Sæbjörnsson (Egill hefur verið helsti sóknarmaður landsliðsins síðastliðin ár, en missti sæti sitt í aðalliðinu í fyrra. Hann hóf ferilinn með liði Gallerís Hlemms en hefur verið í atvinnumennsku í Berlín síðustu misserin. Hann stendur nú á krossgötum og hyggst reyna fyrir sér í Brasilíu. Egill lék nýverið gestaleik með liði i8.)

Varamaður:  Ólöf Björnsdóttir (Ólöf hóf feril sinn sem yngsti liðsmaður i8 á tíunda áratug síðustu aldar. Hún stundaði svo atvinnumennsku í Lundúnum en snéri heim fyrir fáeinum árum og leikur nú með Kling & Bang)

Landslið í gjörningum

Athugasemdir

[Kristbergur O Pétursson, 12.4.2008 kl. 09:50]

Þetta er frábært. Þarna er sko valinn maður og kona í hverju rúmi. Væri gaman að sjá meiri tölfræði svosem um gul og rauð spjöld og sjálfsmörk...

[Ásdís (IP-tala skráð) 12.4.2008 kl. 10:17]

Þetta er bara stórglæsilegt lið og líklegt til afreka. Sérstaklega líst mér vel á leynivopnið á hægri kantinum, lúmskt og útsmogið bragð.

[Kristbergur O Pétursson, 12.4.2008 kl. 11:13]

...og tölfræði um slæma hegðun liðsmanna utan vallar og skrílslæti áhangenda..

[Helgi Seljan (IP-tala skráð) 12.4.2008 kl. 12:20]

Ég er greinilega álíka frumlegur og Mogginn því að í gær fór ég niður í Kling og Bang á þennan stórskemmtilega viðburð og í viðtali við Snorra Ásmundsson spurði ég hann hvort þarna væri ekki um að ræða Landsmót Gjörningafélaga.

[Ransu, 12.4.2008 kl. 17:10]

Já Helgi, það er sálfræðibragð hjá Snorra að segja þetta landsliðið. Hann nýtir sér þarna fyrirséðan góðvilja fjölmiðla og ögrar þá þjálfurum hinna liðanna. Snorri er til alls líklegur. Hann tók við þjálfarastöðu Erlings Klingenbergs þetta árið, hefur verið aðstoðarþjálfari hans til þessa og þarf því að sanna sig. Hann ætlar sér augljóslega stóra hluti með liðið , enda bæði búinn að kaupa Hannes Lár, sækja Ásmund til Tyrklands og brúkar þarna annarskonar taktík í sálfræði.

[Ransu, 12.4.2008 kl. 17:19]

Kristbergur, ég býst við að Hannes Lárusson eigi flest spjöld. Man eftir því þegar Kiddi Harðar og Finnur Arnar, milliríkjadómarar, hentu honum útaf í Nýlistasafninu. Svo lenti hann upp á kant við eina af stjörnum Tate Modern og var hótað að vera vísað út af þeim leik, en gekk þá út sjálfur.  Þetta er svona það síðasta en hann á lengri sögu í þessum málum. En oft eru þessir dómar nú umdeildir.

Ég held nú að þessir liðsmenn séu nokkuð passasamir utan vallar og áhorfendur jafnan til fyrirmyndar, enda yfirleitt afskaplega fáir.

[Hlynur Hallsson, 13.4.2008 kl. 15:46]

Mér líst afar vel á að vera aðstoðarþjálfari Magnúsar Pálssonar í þessu liði. Má þjálfarinn ekki spila annað slagið með? En er ekkert atriði að hafa ellefu manns í byrjunarliðinu? Er svo ekki tilvalið að Snorri verði umboðsmaður og fari að plana næsta landsleik á móti Frakklandi? ég myndi vilja kippa Halla Jóns, Ásdísi Sif og Þorvaldi Þorsteins með á æfingar.

Bestu þjálfarakveðjur,

[Hlynur Hallsson, 13.4.2008 kl. 15:51]

Já, og Óla og Libiu líka. Bestu kveðjur,

[Ransu, 13.4.2008 kl. 18:13]

Mikið til í þessu hjá þér Hlynur. Og viðbótin góð. Þorvaldur auðvitað efni í aðalliðið. Sennilega í samkeppni við Halldór í markinu (fyrir að verja gildi skapandi menntunnar).

 Þú ert augljóslega starfinu vaxinn Hlynur. Magnús er auðvitað tilvalinn þjálfari vegna þess að hann fær alltaf aðra til að performera eftir eigin höfði. En þú ert, eins og ég sagði, spilandi þjálfari, á vinstri kantinum á móti Söru

Og úr því að við erum að bæta við er rétt að hafa gætur á Ragnari Jónassyni, nýkominn úr þjálfunarbúðum í Skotlandi og í lið Nýlistasafnsins. Einnig Gerlu sem hefur verið utan vallar í stjórnarstöðu síðustu ár. En aldrei að vita hvenær hún snýr aftur í spilamennskuna. 

[Kristbergur O Pétursson, 13.4.2008 kl. 21:28]

Áfram, áfram perufrómasar!

[Snorri Ásmundsson (IP-tala skráð) 17.4.2008 kl. 00:11]

Ja sko Ransú..Ertu ekki aðeins of paranojd? Mér sýnist þú vera með ranghugmyndir..:)..

" Já Helgi, það er sálfræðibragð hjá Snorra að segja þetta landsliðið. Hann nýtir sér þarna fyrirséðan góðvilja fjölmiðla og ögrar þá þjálfurum hinna liðanna. Snorri er til alls líklegur. Hann tók við þjálfarastöðu Erlings Klingenbergs þetta árið, hefur verið aðstoðarþjálfari hans til þessa og þarf því að sanna sig. Hann ætlar sér augljóslega stóra hluti með liðið , enda bæði búinn að kaupa Hannes Lár, sækja Ásmund til Tyrklands og brúkar þarna annarskonar taktík í sálfræði."

Kv: Snorri

[Ransu, 17.4.2008 kl. 12:18]

Auðvitað er allt þetta spjall bara ranghugmyndir Snorri minn, leikur og gaman.  Ég var þarna að reyna að fá smá Jose Morinho-brag á ímyndaða  þjálfarastöðuna þína hjá Gjörningaliði Kling & Bang.

[Snorri Asmundsson (IP-tala skráð) 17.4.2008 kl. 13:00]

Ég skil..:) En ekki myndir þú fara kalla í Ásgeir Sigurvinsson eða Atla Eðvaldson ef þú værir að skipa landslið í fótbolta nú í dag?

Eða Kristján Ara og Atla Hilmars í handboltalandsliðið?

kveðja Snorri

[Ransu, 17.4.2008 kl. 14:10]

Nei Snorri ég mundi ekki kalla þá í landsliðið. En það er aðeins lengri aldurstíminn í myndlistinni en í knatt- og handbolta. Kannski er þetta meira eins og í skáklandslið?