Lifandi manneskja seld til listaverkasafnara

Belgíski listamaðurinn Wim Delvoye hefur nú selt lifandi manneskju til listaverkasafnara.  Sá seldi heitir Tim Steiner og er frá Sviss.

Það er þó ekki þannig að listaverkasafnarinn geti gert hvað sem er við manninn því að í samningi má hann hafa hann til sýnis þrisvar á ári, en það fylgdi ekki frétt atrforum.com, hversu lengi hvert sinnið.

Ástæðan fyrir kaupunum er húðflúr sem Delvoy teiknaði á bak mannsins og eftir að Steiner fellur frá mun skinnið á baki hans falla í skaut safnarans eða ættingja hans.

Delvoye hefur áður selt húðflúruð svín En þetta ku vera í fyrsta sinn sem manneskja ber listaverkið á eigin skinni, og kaupin þau fyrstu af þessum toga, eins og sagt er í frétt HÉR

Wim Delvoey vakti fyrst athygli á síðari hluta níunda áratug síðustu aldar, þá rétt rúmlega tvítugur, fyrst fyrir að mála skjaldarmerki á straubretti og síðan fyrir blátt postulínsskraut á gaskúta. Voru þessi verk hans gjarnan notuð sem táknmyndir nýrra strauma póstmódernismans.

Wim Delvoye er nú einhver þekktasti listamaður Belga (einskonar Damien Hirst þeirra í flæmingja, nema bara mikið meira í hann spunnið). Hreint út sagt frábær listamaður.  HÉR er hlekkur á heimasíðu hans.  Hún er sérlega skemmtileg.

Efsta myndin á síðunni er af baki Tims Steiners og má sjá undirskrift Wims undir myndinni.  Verkið er frá 2008.

Myndin hægra megin fyrir miðja síðu er af Delft-gaskútum Delvoyes frá árinu 1988.

Neðsta myndin er af einu skjaldamerki listamannsins á straubretti frá 1988.

Athugasemdir

[Hlynur Hallsson, 9.9.2008 kl. 13:41]

Wim Delvoye hefur verið einn uppáhalds listamaðurinn síðan hann gerði flísarnar á Dokumenta 1992 með kúkamyndum á. Útskornu steypuhrærivélarnar og handboltamarkið með steindu gleri er einnig snilld. Takk fyrir þessar fréttir af honum og bestu kveðjur,

[Hrafnhildur Ýr Vilbertsdóttir, 9.9.2008 kl. 14:16]

Skemmtilegur og áhugaverður listamaður hann Wim Delvoye...takk fyrir, mér finnst það svo frábært þegar þú setur inn linka, ég þarf þá ekkert að hafa fyrir því að finna þessar síður sjálf...

[Steinunn Helga Sigurðardóttir, 9.9.2008 kl. 19:06]

áhugavert og takk fyrir þessa fínu samantekt.

 steina

[Ragga (IP-tala skráð) 9.9.2008 kl. 19:33]

Sérstaklega áhugavert!

Takk fyrir mig.

[Ransu, 9.9.2008 kl. 23:07]

Man vel eftir kúkaflísunum á Kassel Hlynur.  Svo gerði hann líka meltingarskúlptúr sem í bókstaflega melti fæðu og drullaði á gólfið. Held að hann hafi sýnt hann fyrst í Ghent. Safnverðir þurftu að gefa vélinni að borða og svo hreinsa úrganginn. Þetta gaf forvörslu safna alveg nýja merkinu og hlutverk.

Það voru hins vegar gaskútarnir sem náðu mér fyrst.  Sá þá í Listasafninu í Antwerpen 1990. Þakið gólf af deft blau á kútum. Alveg magnað.

Og verði ykkur að góðu gott fólk...