Sólir og sjö ára kúrvur

Ég brá mér út fyrir borgarmúrana á helgarnámskeið á Sólheimum í Grímsnesi á vegum Mannspekifélagsins á Íslandi.

Aðal fyrirlesari og gestur Mannspekifélagsins, Henk Jan Meyer,  rýndi í dulvísindi Rudolfs Steiners og útskýrða þróun mannsins út frá sólum og plánetum og áhrif þeirra á "kúrvur" sem eiga sér stað í lífi manna á 7 ára tímabilum

Ég ætla ekki að reyna að hafa neitt eftir fyrirlesaranum, enda er hausinn á mér gersamlega steiktur eftir helgina.

Henk Jan þessi er myndlistarmaður og því fylgdi námskeiðinu listræn sköpun, en listir eru mikilvægur partur í mannspekinni.

Teikniæfingar byggðust á því að skapa ekki út frá eigin vilja. Að vera ekki listamaðurinn sem túlkar heldur að vera þjónn efnisins sem maður er að vinna með.

Með sama hætti handfjatlaði ég svo hveraleirklessu yfir í platónsk form og reyndist það nokkuð erfitt.

Óneitanlega fróðlegt og frískandi að rýna í listir og dulvísindi á þessum síðustu og alls ekki verstu tímum.

Athugasemdir

[Anna Jóelsdóttir (IP-tala skráð) 20.10.2008 kl. 17:55]

það væri gaman að heyra meira um þetta t.d um þann þátt að vera 'þjónnn efnisins'...áttu dæmi?

[Ransu, 20.10.2008 kl. 20:15]

Í sjálfu sér eru þetta æfingar í að eiga samtal við efnið sem maður skapar með.  Maður bara spyr efnið, en fyrirlesarinn gekk út frá því að allt efni, litir eða leir í þessu tilfelli, væri lifandi. Liturinn er þá lifandi inni í manni sjálfum og með því að eiga í samræðum við hann kviknar eitthvað.

Máski má líka kalla þetta að vera opinn fyrir efninu.

Með leirinn fólst ferlið í að þrýsta á efnið eftir vissum ritma og frá vissum punktum að þá breyttust formin úr einu platónsku formi yfir í annað.  Ef maður var að berja á leirnum eða þröngva formunum fram með afli að þá ruglaðist rithminn í efninu og geometrían með. Formin urðu bjöguð og maður týndi þessari platónsku geometríu.

Við prófuðum þetta og reyndist flestum erfitt að halda rithmanum á milli forma, sérstaklega þegar þau fóru að vera flóknari í geometríunni. 

[Laufey Johansen (IP-tala skráð) 21.10.2008 kl. 21:46]

Það væri mjög gaman að heyra meira af þessu helgarnámskeiði sem þú fórst á þegar þú er búin að melta þetta allt saman, enda mjög áhugavert efni.

Ég vinn með áhrif frá öðrum plánetu, svo áhugi minn er mikill.

[Ransu, 22.10.2008 kl. 09:02]

Þetta snérist reyndar ekki um að vinna með áhrif frá öðrum plánetum. Heldur um að vera undir áhrifum af efninu sem maður er að nota til listsköpunar. Og ég reikna með að það sé í flestum tilfellum jarðneskt.

Plánetur voru til umfjöllunar í samræmi við þróun mannsins á einu æviskeiði.  Þ.e. hvaða plánetur eru ráðandi eða hjálpandi í þroskaferli manneskju og reyndar í sköpunar og -þróunarsögu mannsins.

Og ekki síst tilgangurinn að skoða stöðu og stefnu mannsins í dag. 

[Kristbergur O Pétursson, 23.10.2008 kl. 09:33]

Að vera ekki listamaðurinn sem túlkar heldur að vera þjónn efnisins sem maður er að vinna með.

Ég er stundum að hugsa um þetta. Austræn speki boðar samræmingu hugmyndar, efnis og handverks þar sem hver þáttur styður annan. Á vesturlöndum vilja listamenn beygja allt efni undir vilja sinn í einni meginhugmynd; einskonar nýlendustefna, eða afneita bæði efninu og handverkinu sem líkist  afneitun holdsins í kristilegum meinlætastíl.

Hvenær kemst maður að niðurstöðu um efnið og andann? Ég er hlynntur austrænni speki.