Menningarlega tengt fréttaefni Ríkissjónvarpsins er komið á botninn.

Vegna athugasemda sem komu á síðasta bloggi ákvað ég að líta á vefsjónvarp RÚV og hlusta á viðtal sem birtist í kvöldfréttum á skírdag við íslenska listakonu sem var að opna sýningu í Lundúnum og sækir innblástur sinn til plánetunnar Vulkan. 

Ég þekki reyndar ágætlega til Vulkan og hef hlustað af athygli á Dr. Spock segja frá plánetunni. En honum láðist, í þeim Star Trek þáttum sem ég hef séð, að minnast á myndlistarstrauma hjá hinum eyrnastóru Vulkönum. Það kemur vissulega á óvart hve straumarnir minna svakalega á svarta tímabil Guðrúnar Einarsdóttur í einhverjum "Free flow" damask búningi.  Auk þess upplifði ég Spock, eða aðra Vulkana sem komu fram í þáttunum, aldrei sem "Free flow" náunga. En svona veit maður nú lítið um listir á öðrum plánetum.

Verk þessarar jarðnesku listakonu hafa áður ratað í af listum pistil hjá mér í Morgunblaðinu svo ég vona að menn túlki ekki þannig að ég sé að leggja hana í einelti.  En ég forðaðist í frágreindum pistli að nefna hana á nafn, enda snérist málefnið um stöðu gagnrýnenda á Íslandi í blönduðu myndlistarlandslagi þar sem lítill greinarmunur er gerður á atvinnu- eða áhugamennsku. Og á það sérstaklega við um nálgun fjölmiðla við myndlistina.

Það sem sló mig nú voru ófagleg vinnubrögð fréttastofu Ríkissjónvarpsins og hve umsjónamenn þar á bæ eru gersamlega úr öllum takti við samtímalist og bókstaflega úti í geimnum þegar kemur að málum myndlistar. Nóg hefur mér þótt um að sjá myndir frá kaffihúsasýningum renna með texta í lok fréttartíma. En að birta þetta viðtal í fréttatíma er stofnuninni til háborinnar skammar og er til sönnunar um hve Ríkissjónvarpið er skammt á veg komið í menningarlega tengdu fréttaefni. 

Væntanlega hefur þorri þeirra sem sáu viðtalið haldið að þetta væri grín. Og vissulega var þetta á sinn hátt fyndið, en að sama skapi sorglegt að sjá í fréttum RÚV!

Hér er hlekkur á viðtalið.

http://dagskra.ruv.is/streaming/sjonvarpid/?file=4397870/13

Athugasemdir

[Kristbergur O Pétursson, 23.3.2008 kl. 11:46]

Þetta er að mínu mati dæmi um handahófskennda og geðþóttastýrða ritstjórn sjónvarpsins í myndlistarumfjöllun. Það má spyrja hvort ættarnafn listakonunnar hafi vakið sérstaka athygli fréttastjórans. Varla við hana að sakast fyrir það. Verkin á sýningunni og hugmyndafræðin stendur ekki undir þessu sem frétt eða listviðburði, hvað sem síðar kann að verða uppi á teningnum hjá listakonunni.

[Kristbergur O Pétursson, 23.3.2008 kl. 12:26]

PS. Ég veit ekkert um þessa listakonu, menntun, feril eða annað. Verkin minna auðvitað strax á verk Guðrúnu Einars fyrir þessa meðhöndlun á olíumálningu. Sigurður Guðmundsson gerði svipaða hluti í málverkum í kringum 1985 ef ég man rétt. Ég man eftir risastóru Kjarvalsmálverki sem ég sá á sýningu þegar ég var 12 ára. Ég gat stungið fingri inn í pensilförin. Sennilega er Rembrandt upprunalegur meistari impastomálunar og gerðu samtímamenn hans grín að honum fyrir að mála portrett svo þykkt að hægt væri að taka myndirnar upp á nefinu.

Ég gerði tilraunir með impasto á árunum 1990-1992, undir áhrifum frá þessum körlum, sérstaklega Sigga, enda hafði ég  verið í námi í Hollandi og séð verkin hans.

[Steinunn Helga Sigurðardóttir, 23.3.2008 kl. 13:11]

Blessi þig í Páskaljósinu !

Steina

[B.A. (IP-tala skráð) 2.4.2008 kl. 11:44]

Ég hef nú meiri áhyggjur af fréttum í Morgunblaðinu því í því blaði (þínu blaði) er stefnan markviss. Fréttir af sigrum dóttur menningarritstjórans eru til dæmis mjög áberandi. Þú ert kannski ekki rétti maðurinn til að ræða það mál en einhver ætti að taka það að sér. Ætli planið sé ekki að koma stelpunni á Feneyjartvíæringinn?