Ísland í dag

Það olli talsverðu hugarróti hjá mér þegar ég horfði yfir hópinn á 17 júní göngu í Kópavogi og sá að ímyndir sem prýddu blöðrur barna samanstóðu af fígúrum á borð við Bangsímon, Spæderman og Halló Kittí.

Var mér hugsað til Kjarvals og Errós, þar sem sá fyrrnefndi er lókal listamaður, rómaður fyrir að kenna íslendingum að sjá sérkenni sín, en sá síðarnefndi innleiddi neyslumenninguna inn í listina, gerði íslenska list heimsborgaralega með hasarblaðahetjum.

Eitthvað þótti mér farið að halla á Kjarvalsgildin í þessum hátíðarhöldum. Í Reykjavík hlustaði ég á Júróbandið syngja Abanibiaboebe og This is my life. Ekkert Hæ hó jibbíjei eða Ísland ögrum skorið.

Í bókinni Tilraun um heiminn segir Þorsteinn Gylfason frá skóflu einni á Siglufirði. Hún er sögð sú elsta í bænum en samt er búið að skipta um skaftið á henni í þrígang og hausinn tvívegis endurnýjaður.

Þannig er Ísland í dag.

Allt að 50 þúsund manns í miðborginni í dag

Athugasemdir

[Hrafnhildur Ýr Vilbertsdóttir, 19.6.2008 kl. 19:22]

Hahaha ...gott þetta,  búið að skipta um skaftið í þrígang og hausinn tvisvar.......

[Ásdís (IP-tala skráð) 19.6.2008 kl. 20:01]

Já Hugleik á blöðrurnar fyrir næsta þjóðhátíðardag!

[Kristbergur O Pétursson, 20.6.2008 kl. 07:05]

Sama skóflan eða ekki, um það má deila í ræðukeppnum framhaldsskóla. Ég hef heyrt svipaða sögu um stagbættan sokk. Fljótin hafa runnið til sjávar um þúsundir ára, en það er aldrei sama vatnið í þeim, eða hvað. Ég var í vinnu á sautjánda, keyrði marga bílfarma af uppblásnum blöðrum um allan bæ í Hafnarfirði. Það var léttur og litríkur farmur, en þær áttu það til að springa ein og ein við aksturinn.