Myndir frá Journey to the Centre

Fékk ljósmyndir í gær frá sýningunni Journey to the centre í Broadway gallery í New York borg.  Þær eru eilítið dökkar en gefa einhverja mynd. Birti hér eitt sjónarhorn.

     Á sýningunni eru verk eftir Önnu Halldórsdóttur, Elsu D. Gísladóttur, Guðrúnu Veru Hjartardóttur, Helgu Arnalds og JBK Ransu. 

Var ákveðið að verkin tengdust að einhverju leyti í umræðu (sbr. undirtitill Bioprocess) og unnið með gólf, veggi og loft og tvívítt, þrívítt, hreyfiverk og hljóð (því miður ekki hægt að ljósmynda hljóðið) 

 Ég læt líka eina opnunarmynd og svo mynd af einu af verkunum mínum á sýningunni. Verkið er úr seríu sem heitir "Tómt" og er unnin með límpunktum á sjálflýsandi (fluorescent) auglýsingarkarton. 

Ég sýni samskonar pappírsverk ásamt veggmynd akkúrat þessa dagana í Jónas Viðar gallerí á Akureyri.

 Margrét Elísabet, fagurfræðingur, var þá á opnuninni og spurði mig í gamni hvort það væri kreppan sem kallaði eftir slíkum úrlausnum.  En ef maður spáir í það að þá eru þetta ídeal kreppumálverk, gerð úr ódýrum tilbúnum efnivið, eru auðveld í flutningum (má flytja á milli landa í bóluplastumslagi) en stækka á vegg sökum tóma flatarins sem skapast fyrir miðju . Þ.e. a. ég sný jaðar pappírsins sem ég hef skorið í að hvorum öðrum og því skapast tómur flötur á milli þess er endar pappírsins mætast.

Auk þess er tilvalið að nota þessa límpunkta til listsköpunar sem annars eru notaðir til að merkja seld eða frátekin listaverk á sýningum.  þeir eru varla notaðir mikið í það þessa dagana.

Athugasemdir

[Anna Jóelsdóttir (IP-tala skráð) 7.10.2008 kl. 13:46]

ég sé ekkert kreppulegt við þetta græna verk. kallar fram gleðivibrögð, bros, heimþrá,  gefur mér eitthvað til gott til að hugsa um, takk

[Anna Jóelsdóttir (IP-tala skráð) 7.10.2008 kl. 14:05]

er þetta ekki einmitt tíminn sem mest er þörf fyir list..og frekar kaupa list en verðbréf fyir þá sem  eru á vergangi með sparifé í sokk..listin er góð fyrir geðheilsuna og fyrnist ekki..

[Hrafnhildur Ýr Vilbertsdóttir, 7.10.2008 kl. 20:24]

nákvæmlega! listin er góð fyrir geðheilsuna....ég labba oft þarna framhjá hjá Jónasi...kemur mér í gott skap að líta inn um gluggann .

[Ransu, 8.10.2008 kl. 00:16]

Takk fyrir það Anna og Hrafnhildur.

Eftir síðari heimstyrjöldina fór Rene Magritte að mála mjög litríkar og jafnvel trúðslegar myndir.  Þetta tímabil í list hans var síðan kallað "íróníska tímabilið".  Magritte kunni aldrei við þá skilgreiningu.  Ætlun hans var að gleðja fólk eftir hörmungar. Og var engin írónía þar að baki.

Kv.

[Kristbergur O Pétursson, 8.10.2008 kl. 09:07]

Allt er á hverfanda hveli. Það er verið að stokka spilin alveg uppá nýtt. Gamla nýríka Ísland græðgi, sóunar og sérhyggju er að líða undir lok.

Hver var það sem hélt því fram fyrir ekki löngu að eina óbrigðula gildi myndlistar væri peningagildið? Nú þegar bankar, gjaldmiðlar, lánstraust riða til falls í heiminum, hvað er þá eftir af gamla góða peningagildinu, síðasta vígi listarinnar?

Spilin er stokkuð og síðan verður gefið. Það er líka verið að hreinsa af borðinu. Það verður spilað eftir öðrum leikreglum en hingað til. En hvað það verður veit nú enginn, vandi er um slíkt að spá.

Á meðan ætla ég að kveikja á kerti og líta í ljóðabók sem ég fékk í jólagjöf í góðærinu en vildi ekki eyða tíma í að lesa því mér var sagt að ljóðið væri dautt.

[Anna Jóelsdóttir (IP-tala skráð) 8.10.2008 kl. 16:13]

 við í listbransaum þurfum að tengja á okkur straumbreyti og sem býr til skapandi afl úr áhyggjum og áhyggjum..