Bestu myndlistarsýningar ársins 2009

Myndlistarárið 2009 var rólegra en oft áður. Sýningarsölum fækkaði, gallerí minnkuðu við sig og myndlistarmenn virðast fara sér hægt.  Það má þá vænta vandaðra sýninga á nýju ári. 

Ég missti því miður af sýningum á landsbyggðinni sakir þess að Morgunblaðið sendi ekki myndlistargagnrýnendur út úr bænum eftir hrun. En yfirleitt hafa allavega einhverjar sýningar á Akureyri verið á topp 10 listunum mínum.  Þetta verður því að teljast listi yfir Reykjavík og Reykjanes.

 

10 bestu myndlistasýningar ársins 2009

   1)      Svavar Guðnason,  Listasafn Íslands

Yfirlitssýning á verkum Svavars Guðnasonar í Listasafni Íslands var nokkurskonar „redux“ útgáfa af sýningu sem var haldin fyrir 19 árum síðan. Af þeim sökum fellur framkvæmdin kannski ekki í hóp þeirra framsæknustu á árinu, en Svavar er bara svo magnaður málari að yfirlitssýningar á honum ættu að vera með minnst 19 ára millibili.

 2)      Guðjón Ketilsson,  Hlutverk,  Listasafn ASÍ

Besta nýja sýning ársins. Guðjóni tókst að setja fingurinn á samtímann með því að stúdera hlutföll og áminnti okkur að við fyllum ekki upp í innra tómarúm með utanaðkomandi hlutum.

 3)      Inga Þóry Jóhannesdóttir, Flökkuæðar-Loftfar, Listasafn Reykjanesbæjar

Inga Þórey glímdi við Foucaultískar pælingar um „staði í sjálfu sér“ og tengdi sýninguna við flugvöll, farartæki og ferðatöskur.

Sýning sem fór hljótt sakir þess að vera í heila 50 kílómetra vegalengd frá Reykjavík, en tvímælalaust ein sú besta á árinu.

 4)      Kristján Guðmundsson,  Listasafn Íslands

Þetta var sennilega ár Kristjáns.  Fyrst Yfirlitsýning á höfuðlistasafninu og síðan Carnegie verðlaunin.

 5)      Ívar Valgarðsson,  Hringir,  Listasafn ASÍ

Virkilega flott  unnið með rými og efni (merkipennar). Ívar samkvæmur sjálfum sér og  fyllti salinn með næstum því engu.

 6)      Frá Unuhúsi til áttunda strætis, Listasafn Reykjavíkur – Kjarvalsstaðir

Listmálurunum Louisu Matthíasdóttur og Nínu Tryggvadóttur var vandlega stillt upp með goðsögninni Hans Hoffman og fleiri sem höfðu numið hjá meistaranum. Það var sérstaklega eitt verk eftir Hoffman sem fékk mig til að sækja sýninguna í fjórgang.

 7)      Olga Bergmann,  Í húsi sársaukans,  Listasafn Reykjanesbæjar

Þetta framlag listasafnsins til Listahátíðar í Reykjavík var sannkallað heilanudd. Listakonan leikstýrði vídeógjörningi sem kallaðist á við skúlptúra sem hún kom fyrir í rýminu. Tilraunaheimur Olgu er ætíð heillandi en hér náði hún nýjum hæðum í furðulegheitum.

 8)      Egill Sæbjörnsson,  Starandi frásögn, Listasafn Reykjavíkur - Hafnarhús

Egill leggur mikla áherslu á skemmtanagildi í listaverkum sínum, án þess að það taki yfir listina. Hann er „artentainment“ út í eitt.

 9)      Ásmundur Ásmundsson, Hola, Listasafn Reykjavíkur - Hafnarhús

Enn einn steypuminnisvarðinn eftir efnahagshrunið nema hvað þessi var gerður í gamni. Sýning fyrir alla sem elska og hata íslenska samtímalist.

 10)   Ólafur Elíasson,  Limboland,  Gallery 100°

Heillandi sjónarspil hjá Ólafi.  Ljós, gufa og tómt glerbox.