Fyllt í tómið

Var alveg búinn að gleyma að...

...Sýningu minni "Tómt" í Jónas Viðar galleríi er lokið sem/og sýningunni A Journey to the centre í Broadway gallery í NYC þar sem ég átti einnig verk undir yfirheitinu "Tómt".

Aðallega eru þetta verk unnin með límpunktum á fluorescent auglýsingarkarton, en í JV galleríi var einnig ein veggmynd unnin með fluorescent málningu.

Hugmyndin að tómum myndverkunum hóf að herja á mig í sumar og þá aðallega úr tveimur áttum.

Annars vegar er það hneigð mín til Austurlenskra fræða og gildi hugleiðslunnar. Fókusinn á hið tóma, Þegar maður fyllist af engu.

Hins vegar er það upplifun á nútímalistasöfnum og skrásetningu myndlistar í Evrópu þar sem gengið er markvisst eftir því að fylla upp í gefinn "glóbalískan" staðal. Þ.e. að hvert land þarf að eiga sinn expressjónista, sinn oplistamann, sinn mínimalista o.s.frv. til að vera með.

Þegar ég gekk út úr einu slíku safni í sumar, yfirfullu af ólíkum en stöðluðum tegundum af málverkum, upplifði ég sterklega að allt sem var þar til sýnis væri í eðli sínu tómt. 

Þessi tilfinning hefur ágerst og þess meiri ástæða að skoða hana í listsköpuninni og hyggst ég gera það frekar á næstu einkasýningu sem verður í Turpentine á næsta ári.

Þá var viðeigandi þegar efnahagurinn krassaði sökum ofurneyslu með peninga sem voru í rauninni aldrei til, að vera með myndverk sem einblíndu á "tómt". En það kom bara sem bónus og ekki meðvitað frá mér komið. Máski bara viðeigandi stemmning.

Athugasemdir

[Anna Jóelsdóttir (IP-tala skráð) 28.10.2008 kl. 14:35]

ég er spennt að fylgjast með hvernig þessi hugmynd þróast áfram hjá þér,

þegar ég sé 'tómið' eða óuppfyllt pláss í myndverkum fer einmitt ímyndunaraflið í gang..ég sé það sem pláss til að hugsa í yfirfullum nútímaáreitum.. 

[Kristbergur O Pétursson, 29.10.2008 kl. 09:17]

Ég hef skoðað mörg svona listasöfn full af sýnishornum úr listasögunni. það sækir stundum á mann tómleiki. Ekki það að verkin verðskuldi ekki að vera á opinberu safni en þau eru ein... þau eru ekki heima hjá sér heldur á stofnun. Það er holur hljómur í þessu en ekki endilega rödd tómsins.

[Kristbergur O Pétursson, 29.10.2008 kl. 20:25]

Um tómið er hægt að segja tvennt með nokkurri vissu:

A) Það er alltaf til einskis.

B) Það er aldrei til neins.